Ayuntamiento de Errezil

Gastronomia

Udaletxeko irudia

ERREZILGO AZOKA

Errezilgo Azoka, 1994ko azaroan sortu zen, emakume talde baten ekimenari esker. Ingurumena errespetatzea, lurrari loturiko nekazaritzan oinarritzea eta elikagaiak inongo gehigarririk gabe ekoiztea da gure helburu nagusiena.

Beraz, KALITATEA da Errezilgo Azokako produktuen ezaugarri nagusia.

Zure zalantzak argitu eta argibideak eska ditzazun, baserritar ekoizlearekin HARREMAN ZUZENA izateko aukera paregabea ere baduzu.

Errezilgo Azokan topa dezakezu sagar guztien artean errege den ERREZIL SAGARRA, sagar zaporetsua, mami gogorrekoa. Sagar hau, gure aiton-amonek egiten zuten bezala, banan-banan golkora bildu eta aukeratua duzu. Kontsumitzaileari sagarrik onena eskaini nahian, baserritarrok kontu handiz eginiko lanaren fruitua da. Eta, sagar gordinarekin batera, Ibarbi-sagar, menbrilo, mermelada eta sagardoa ere topa ditzakezu. Guztia zuretzat bereziki egina.

ZER AURKI DEZAKEGU ERREZILGO AZOKAN?
Errezilgo Azokan, sagar eta sagarkiez gain, Errezilgo baserrietan ekoiztutako edozein produktu topa dezakezu, hala nola, era guztietako mermeladak, ardi eta behi gazta, barazkiak, likoreak, ogia, eskulanak, etab. Guztiak ohiko eran, gehigarririk gabe eraldatzen dira. Eta, gainera, kontsumitzailearekin harreman zuzena dugulako, era guztietako produktuen eskerarei erantzuten saiatzen gara; gure baratza eta baserrietan ekoitz dezakegun guzti-guztia zuen eskura jartzen dugu.

KALITATEA OINARRITZAT hartzen dugunez, zure laguntzarekin eta iritziarekin bat eginez, buru-belarri ari gara lanean zebitzua hobetzearren.

Produktu berezi hauez gain, oinarrizko beharrak asetzeko eguneroko beharretarako ezinbestekoak direnak ere aurki ditzakegu, hala nola, garbitzeko produktuak, elikagaiak...

NON TOPA DITZAKEGU ERREZILGO AZOKAKO PRODUKTUAK?
Gure produktuak nahi izanez gero, Gipuzkoa eta Euskal Herri osoko hainbat azokatan topa ditzakegu baina, EGUNERO, ERREZILGO UDALETXE AZPIAN gure produktuak saltzeko tokitxo bat dugu.